Aadarshlok – Utopia

Aake milte hain indradhanush jaha,
Basaya hai maine apna ghar waha.
Khwahishon ki kashti hai mera vaahan,
Anginat armaano jitne hai waha saadhan.

Insaan bhi insaaniyat jaanta hai jaha,
Mukhaute bina rishte nibhata hai waha.
Na jhooth hai na hai fareb ka koi nishaan,
Khushi Khushi rahta waha har Insaan.

Na darti hai pariyan failane se pankh jaha,
Andhere me bhi basta raam rajye waha.
Phoolun Ko kuchalne wale na koi kadam,
Chida aur chidhiya dono hi hai Param.

Khwahishein Banti nahi zanjeerein jaha,
Rhoodiwadi soch nahi jakadti saansein waha.
Buland honsle bharte hain waha Udaan,
Kone kone me basti hai khushiyon ki dukaan.

Na koi bechara hai, na koi asahaaye jaha,
Na Darr failane wali chalti hai aandhi waha.
Jaha mamta ki kirne aur hai pyaar Bhari baarish,
Banaate indradhanush kare poori har guzaarish.